تک آغاج

             تک آغاج

دنمیشم قورّو آغاجا، نَه کولگه واروم نَه ثُمر     

هر کیم گلیر قریر تالام، هیچ بیلمز مندن نَه گَچَر

تک آغاجام بیاباندا، گوزوم قونان کِچَن ائیلده        

باغروم دِنِبدور آل قانا، هر گینیم بیر ائیله گَچر

آغاج که بارو برگِ وارو، سحر پسین کولگه وِرَر        

هانو دیاردا گورمیشنگ، یاش آغاجا وورانگ تبر

گوزدن دیشیب باخان یوخوم، توکه اَیاغوما کود سو      

نه گورمشنگ بو تارویو، گئنه ائوزه رحمه گَلَر

هر باشخارونونگ قدیمنن، دیبلر ائوزی قولو وارو        

آتیر سول گوزِم قاباقو، غم یمه خوش خبر گَلَر

دشمن قاباقوما دوریر، دوست دالومنان خنجر ووریر     

وای حالونا آغاجوکه، اونا ائوزوندن قورد دیشَر

دیلّر که من قرّیمیشَم، هیچ یئرینگ دردینی یِمَم   

بیر همدم یوخومدور بیله، غملی گوینمنَن نَه گَچَر

هرگئجنینگ گوندوزی وار، هر توسانونگ دا فایوزو  

ائیل دولانار قیش باش اولار، قیش دولانار یازا دونَر

یاز نسیمه گئنه قوپار، سیپیرَر غم جان و تَندَن         

افسیلر چیچک سنبولّار، آچولار غونچالار گیلَر

بهی شعر و غَزَلِنَن ، تک آغاج اقبالو یازوب          

آی آغاج ندر گوناهونگ، بئله گین باشونگا گَلَر